काठमाडौं – सशस्त्र प्रहरी बल नेपालले मंगलबार ५६ जना एसपीमा र ८४ जना डिएसपीमा बढुवाको लागि नाम सिफारिस गरेको छ। बढुवा हुने एसपी सि.सं ३ र डिएसपी सि.सं ७ का रहेका छन्। २०६० भाद्र २९ गते भर्ना भएका सि.सं ३ इन्स्पेक्टर टोलीबाट यसअघि २९ जना एसपी भइसकेका छन् भने बाँकी रहेका सबै ५६ जना आज एसपी भएका हुन्। यसैगरी २०६४ सालको सि.सं ७ बाट यसअघि ५६ जना डिएसपीमा बढुवा भइसकेको छन् भने आज बाँकी ८४ जना बढुवा भएका हुन्। यसैगरी २०६६ मंसीर २१ गते भर्ना भएका सि.सं ८ सशस्त्र प्रहरी निरीक्षकको टोलीबाट ११ जना समेत डिएसपी भएका छन्।
डिएसपी भएका दुवै टोलीबाट योग्यता, कार्यक्षमता, तालिम, कार्यसम्पादन मुल्याङ्कनलाई आधार बनाएर गरिएको छ। सि.सं ३ बाट यसअघि एसपी भएका पनि सोही आधारमा गर्दा धेरैजसो पहिलो लटमा डिएसपी भएका र केही दोश्रो लटमा डिएसपी भएका थिए। सो टोली २०६७, २०६९ र २०७० मा गरी तीन पटक डिएसपी बढुवा भएका थिए।
सशस्त्र प्रहरी महानिरीक्षक राजु अर्यालले संगठनको नेतृत्व सम्हाले देखि नै बृत्तिबिकासमा ध्यान दिदै संगठनलाई नीति नियम अनुसार अघि बढाउन खोजेसँगै सरुवा बढुवा लगायतमा व्यापक परिवर्तन गर्दै पारदर्शी ढंगले काम हुन थालेपछि एसएसपी देखि सहायक हवल्दारसम्म ६ हजार ४ सय १३ जना कर्मचारीको एकैपटक बढुवा भएको छ ।
सशस्त्र प्रहरीमा वर्षौदेखि रहेको वृत्तिविकासको समस्या समाधान गर्न केही समयअघि संगठन सर्वेक्षण तथा व्यवस्थापन (ओ एण्ड एम) मार्फत केही दरबन्दी थप र केही पदहरु समायोजन भएका थिए। यस पटक ओ.एण्ड एम. नभएको भए डिएसपी र एसपी बढुवाका लागि अझ ४ वा ५ वर्ष कुर्नुपर्ने अवस्था थियो।
