काठमान्डौँ- गत वर्ष चीनको अर्थतन्त्र झन्डै आधा शताब्दीमा दोस्रो पटक सबैभन्दा सुस्त दरमा बढ्यो । यो देशको कडा कोरोनाभाइरस नियमहरूले व्यवसायहरूलाई कसरी असर गरेको छ भन्ने सङ्केत हो । आधिकारिक तथ्याङ्क अनुसार विश्वको दोस्रो ठुलो अर्थतन्त्र सन् २०२२ मा तीन प्रतिशतको दरले वृद्धि भएको छ । यो चिनियाँ सरकारले तोकेको ५.५ प्रतिशत लक्ष्यभन्दा निकै कम हो । यद्यपि, धेरै अर्थशास्त्रीहरूले चीनको लागि अझ कम वृद्धि दरको भविष्यवाणी गरेका थिए । गत महिना, चीनले आफ्नो कडा शून्य–कोभिड नीतिमा नरम देखाएको थियो । चीनको यो नीतिले देशको आर्थिक गतिविधिमा ठुलो प्रभाव पारेको थियो तर कोभिड नियममा एक्कासि खुकुलो बनाउँदा कोरोनाका केस पनि बढेका थिए । जसका कारण सन् २०२३ को प्रारम्भिक महिनामा विकास दरमा पनि जोखिम बढ्यो । गत वर्ष चीनको आर्थिक वृद्धिदर सन् १९७६ यताकै सबैभन्दा कमजोर थियो । अर्थशास्त्रीहरूले विश्वव्यापी अर्थव्यवस्थाको स्थितिलाई मध्यनजर गर्दै हालैको महिनामा चेतावनी दिइसकेका छन् । गत हप्ता, विश्व बैङ्कले विश्वव्यापी अर्थतन्त्र ‘चिन्ताजनक रूपमा मन्दीतर्फ गइरहेको’ भनेको थियो । यसको पछाडि युक्रेनमा रुसको युद्ध र कोरोना महामारीको प्रभावका साथै थुप्रै अन्य कारणलाई जिम्मेवार बताइएको छ ।
