काठमाडौं- कलंकीमा कारले मोटरसाइकल, स्कुटर र पैदलयात्रीलाई ठक्कर दिएको छ। उक्त दुर्घटनामा परि ६ जना घाइते भएका छन् । महानगरीय ट्राफिक प्रहरी महाशाखाले जनाए अनुसार बिहीबार दिउँसो कालिमाटीबाट कलंकीतर्फ आउँदै गरेको बा ५ च ५४४० नम्बरको कारले एउटा मोटरसाइकललाई ठक्कर दिएको थियो । त्यसपछि हुत्तिएको कारले स्कुटर, पैदलयात्रीलाई ठक्कर दिँदै सटरमा गएर ठोक्किएको प्रहरीले जनाएको छ । एक प्रहरी अधिकारीका अनुसार चालकले मोटरसाइकललाई ठक्कर दिएपछि आत्तिएर एक्सिलेटर दबाउँदा घटना भएको आशंका गरिएको छ । घाइतेहरुको शहीद मेमोरियल अस्पतालमा उपचार भइरहेको प्रहरीले जनाएको छ । प्रहरीका अनुसार घाइतेहरुको अवस्था खतरामुक्त रहेको छ। घटनाको बिषयमा थप अनुसन्धान भैरहेको प्रहरीले जनाएको छ ।
